عُقْد

عُقد اللؤلؤ…

بطّل يبرُق

أنا صدّقت جمال اللمعة

لكن اللمعة لا يمكن تصدُق

أصل زوال النعمة لحكمة

حكمة ربي و ربي بيرزق

ياللي تحب العُقد… براحتك

بس العقد تملّي بيخنق

حبني

من بين بنات الدنيا…
شوفني و حبني

إشمعنى شخصك شدني؟
مهما عيونك تغترب…

و سطور مشاعرك تتكتب…

اختارني و افضل حبني
يمكن مش الأحلى أنا

لكن أنا… عندي الهنا

اختارني و افضل حبني
أنا بحجزك… أنا هخطفك

أصلي ابتديت أستلطفك

اختارني و افضل حبني
أحلامي لسه بتتبني

معقولة يعني تصدني؟

اختارني و افضل حبني

لفّة

مهما اتكَلْفِت و لا اتخفّى

مهما أقول القلب استكفى

سف الحب لآخر سفّة

لكن لما تهف الهفة

أنا برجعلك واد في اللفّة

جرح القلب يرفّه الرفّا

و اضحك أنا و جروحي الخافّة

أنا بحكيلك… 

و أنا متأكد إنك عارفة

هفضل أحبك…

لمّا يكون الحب مخالفة

أنشف وِش

آه معلش

لازم كنت في وقت أفِشّ

لازم أحرّم…

أنفش نفسي و لو بالغِش

عارف لما…

تبهر حد لحد ما تتعب…

و ما تبهرش؟

إنه يشوفك دايما عادي…

و إن عمايلك ما بتِفرِقش

لما يصدّر وشّه الناشف…

أنشف وِش