شك

عين الحقيقة بتختفي…
ما بقتش ليها عيون
الشكل عادي يخدعك…
الرك عالمضمون
و في ضمن كل اللي ابتدا
نفس السؤال بيكون
ما تبص جنبك في المدى
إيه في المدى مضمون؟
الشك وارد إنما…
كتر الشكوك ملعون
و اللي شكوكه بتركبه…
آخرة شكوكه جنون
إسأل سؤالك و انتظر…
الرد برضه سكون

Advertisements

إستهتار

مرة قابلت الشاب المِعجِب…
كان عالشط و قال بحّار

و أما طلبت يسوق المركب…

بص الناحية و دار

لما واجهته لقيته هيكدب…

كدب مذوّق بالأعذار

بدأ القلم الناشف يكتب…

سطر كتابة بدون إنذار

لما قراها الشاب المعجب…

شفت في نني عيونه شرار

قال لي ما تحسب زي ما تحسب…

بس بلاش الاستهتار

لو عضيت الكلب يعضك

لكن الكلب ماهوش غدار

عُقْد

عُقد اللؤلؤ…

بطّل يبرُق

أنا صدّقت جمال اللمعة

لكن اللمعة لا يمكن تصدُق

برضه زوال النعمة لحكمة

حكمة ربي و ربي بيرزق

ياللي تحب العُقد… براحتك

بس العقد تملّي بيخنق

حبني

من بين بنات الدنيا…
شوفني و حبني

إشمعنى شخصك شدني؟
مهما عيونك تغترب…

و سطور مشاعرك تتكتب…

اختارني و افضل حبني
يمكن مش الأحلى أنا

لكن أنا… عندي الهنا

اختارني و افضل حبني
أنا بحجزك… أنا هخطفك

أصلي ابتديت أستلطفك

اختارني و افضل حبني
أحلامي لسه بتتبني

معقولة يعني تصدني؟

اختارني و افضل حبني